ضبانة ويستوورلد

من أكتر الحاجات البتكيفني في الأفلام/المسلسلات (الأمريكية بالذات) هي لمن الصناع يلقوا مجاز بصري visual metaphor لمفاهيم مجردة abstract concepts. مسلسل Westworld اللي هو في رأيي أعظم مسلسل في الكم سنة الفاتوا، لمن لايعرف: ويستوورلد بيحكي قصة “مدينة ملاهي” theme park ضخمة بيزوروها الأغنياء عشان يلعبوا برجال ونساء آليين مصممين كما البشر تماما في شكلهم وأحاسيسهم، ويطبقوا عليهم كل أحلامهم السمح منها والكعب: يحبوهم، يقاتلوهم، يغتصبوهم، إلخ.. والآليين (المسلسل بيسميهم hosts أو مضيفين) ما بيقدروا يدافعوا عن نفسهم خارج دائرة محددة من البرمجيات code ومستحيل المستحيل إنهم يتسببوا بأذى للضيوف البشريين، على قول المثل الإنجليزي: “مستحيل يتسببوا بالأذى حتى لذبابة” أو They wouldn’t hurt a fly، طبعا المسلسل بيطرح السؤال المعهود في الأعمال المن الثيمة دي، Do Androids Dream of Electric Sheep? أو هل يحلم الآليون بخراف آلية؟ (اللي هو عنوان قصة قصيرة للأمريكي فيليب كيندرد ديك، وبيتم إعتبارها الأم الملهمة لأسلوب السايبربنك cyberpunk اللي هي الجينرا المفضلة عندي على الأطلاق فيما يتعلق بالأفلام وألعاب الفيديو.

المهم، تقديم المسلسل وجينرا السايبربنك بيحتاجو بوست براهم. أنا كنت بقول في شنو؟؟ أيواا.. عايز أتكلم عن إنو المسلسل بينجز مجازات بصرية بحرفنة شديدة، مثلا في الحلقة الأولى في ضبانة ظهرت أكتر من مرة.. المرات الأولى ظهرت عشان توكد مفهوم إنو الآليين لا يمكن يؤذوا ضبانة، في مشهد بنشوف واحدة من الآليين في وضع زي sleep mode الضبانة بترك ليها جوا عينها، ولااا بترمش.. في مشهد تاني في مجموعة من الضيوف بيتقرصنوا على واحد من الآليين، برضو بترك فيهو ضبانة ولااا بيهشها، ده كلو عشان الصناع يورونا (يورونا عديل مش يكلمونا بس) يورونا إنو الآليين ديل عبيد برمجيتهم تماما، تاني في مشهد لمن واحد من الهوستس الآليين ديل حصلت ليهو مشكلة في الأداء/البرمجية بتاعو، في ضبانة ركت ليهو في وشو .. ناس الكمبيوتر بيستخدموا عبارة bug لوصف الأخطاء البتحصل في البرامج، فصناع المسلسل عبروا عن المشكلة الحصلت في برمجية الشخصية/الهوست بإنهم أظهروا حشرة bug حرفيا في نفس المشهد.. أنا صفقت هنا طبعا، المرة الأخيرة كانت في آآآخر مشهد من الحلقة لمن واحدة من الآليين بدت “توعى”.. الضبانة ركت ليها في رقبتها، المرة دي الآلة دافعت عن مفسها بإنها رصعت الضبانة كتلتها في حتتها.. كدا نحنا شفنا شوف العين إنو الآليين ممكن يثوروا وده ب set off قصة المسلسل ومسار الأحداث الجاية كلها.

أسع بحضر في الحلقة الخامسة من السيزون التاني، ظهر فيها حوار عن “الذباب”.. حوار ما طبيعي، بإختصار نفس الهوست القتلت الضبانة في سيزون 1 (اسمها دولوريس) حكت قصة عن مرض أصاب الأبقار بتاعة أبوها وكان ناقل المرض هو الضبان، وإنو أبوها إضطر يضحي بالبقر المصاب ويحرقو عشان يشرد الضبان بالدخان.. بعد سنين من مشاهدة عدد لا متناهي من الأفلام والمسلسلات الأمريكية (ذات الجودة العالية، زي ويستوورلد ده)، بقت عندي حاسة سادسة في توقع حاجات بناء على ملاحظة patterns زي دي.. وأنا أسع بعلن توقعي إنو الشخصية التانية في حوار الذباب من حلقة الليلة (اسمو تيدي) حيموت قريب

دولوريس حتقتل/تضحي بتيدي في السيزون ده

الما حضر ويستوورلد يتصرف يحضرو سريع

تعديل: اسبويلاااااااار

توقعي ظبط 😆 كتلتو فعلا

اتوقعتها تكتلو على نهاية السيزون لكن بت الكلب كتلتو في نفس الحلقة

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s